Inuit Issittormiut Siunnersuisoqatigiiffiat, ICC, nutaamik siulittaasortaarpoq

Nuuk, Kalaallit Nunaat, Juunip 18-iat 2009 – Inuit Issittormiut Siunnersuisoqatigiiffiata, ICC-p nalunaarutigaa James (Jimmy) Stotts ICC-mi siulittaasunngortoq. Patricia Cochran, sapaatip akunnerata kingulliup ingerlanerani tunuartoq taarserlugu ullumi Nuummi immikkut ittumik ataatsimiittoqarnerani ICC-p siulersuisuunerisa tamarmik akuersinerisigut toqqarneqarpoq.

Jimmy Stottsip, Inuppiaasup, Alaskami Barrowimeersup, Issittumi sulianut nunallu tamalaat akornanni misilittagaqarluarnera ICC-mut iluaqutaassapput, aammalu ukiorpassuarni, 1980-imit 1989-ip tungaanut, ICC-p suliaanut qanimut malinnaaneq, allaffimmi pisortaaneq siulersuisunilu ilaasortaaneq tunuliaqutarai. Tamaat atuaruk...

Nittartagaanut tikilluaritsi

Inuit Issittormiut Siunnersuisoqatigiifiat, ICC tassaavoq naalakkersuisuti- guunngitsumik suleqatigiiffik nunat sisamat akornanni suleqatigiiffiusoq. Inuit Alaska-p, Canada-p, Kalaallit Nunaata Rusland-imilu Chukotka-p issittortaanni najugallit katillugit 160.000-it missaannittut sinniisoqarfiat.

ICC-p anguniagai tunngaviusut tassaapput:

• Inuit Issittumi najugallit ataasiunerulernissaat anguniarlugu
• Nunarsuarmioqatigiit akornanni Inuit soqutigisaat pisinnaatitaaffiilu illersussallugit
• Inuit kulturiat inooqatigiinnerallu nalerput siunissarlu eqqarsaatigalugit tammatsaaliorlugulu siuarsassallugu
• Nunani najugarisatsinni politikkikkut, aningaasarsiornikkut inooqatigiinnikkullu ineriartortitsinissap tamakkiisumik eqeersimaartumillu peqataaffigineqarnissaa anguniarlugu
• Issittumi avatangiisinut tunngasunut politikkeqarnissaq ataavartussaq ineriartortissallugu kaammattuutigissallugulu
• Nunap Inoqqaavisa inuttut pisinnaatitaaffiisa nunarsuarmioqatigiinni akuerineqarnissaat sulissutigissallugu.

 ICC ukiut sisamakkaarlugit ataatsimeersuartarpoq, naggueqatigiit Inuit qalasersuaq avannarleq kaajallallugu najugallit katersuuffigisartagaannik. Ataatsimeersuarnermi aallartitat præsidentissaminnik siulersuisunillu qinersisarput naalakkersuinikkullu anguniagassat inassuteqaatillu aalajangersorneqartarlutik. Ataatsimeersuarneq kattuffiup ingerlanerani qitiulluinnarpoq, tassani pissutsit tamanut pingaarutillit oqallisigineqartarmata, ICC-p ingerlariaqqiffissaanik tikkuussiffiummat naggueqatigiillu Inuit kulturikkut ataqatigiinnerat nukittorsarneqartarmat.